السلام عليكم ورحمة الله وبركاته
اسعد الله اوفاتكم جميعا بكل خير
...
مقدمه
كنت صاحب منتدى كبير ولا فكرت افتح قسم للمشاكل الزوجيه او اي شي يخص للزواج لاني كنت في السابق امرها مرور الكرام في المنتديات ولا اشعر بما يشعر فيه المتزوجين من ايجابيات او سلبيات .. لان وقتها عزوبي واشوف الوضع عادي .. لكن قدر الله وسجلت عندكم بعد مابحثت عن المنتدى المناسب اللي اطرح فيه مشكلتي الزوجيه والحرب النفسيه اللي جابت لي الحيره وكرهتني بكل شي حولي ..
اخواني قبل ان ابدا بالموضوع
تذكرو اني اكتب لكم هالموضوع من قلب.. وتذكرو اني في حيره .. ويشهد علي ربي اني من الناس اللي ماحب اشكي لاحد لان الشكوى لغير رب العباد مذله .. لكن انا هنا استشيركم .. وكثير زيي ومر باللي مريت فيه ويمكن اكثر .. لان مافيه احد مرتاح بس بعض المشاكل عند مشكله تهون ... واللي مايكون عون لايصير فرعون يعني المطلوب في الردود الانصاف والسلاسه من ناس وسيعين بالعرف والمعرفه وانشاء الله اني اكون اصبت في اختياري لمنتداكم الراقي .وعندي ملاحظه واسف ان زودتها شوي
الرجاء الرجاء الرجاء .. عدم التعاطف او العنصريه للزوج او الزوجه المطلوب هو الانصاف فقط وحطو نفسكم مكاني..
تعريف
اول شي انا شاب ابلغ من العمر 32 سنه ومتزوج صار لي 3 سنوات وعليها .. طبعي ماحب الرسميات كثير مبتسم مع الكبير والصغير ..غير معقد واكره التعقيد مرح يعني ع قولتهم ( فله ) افهم في الزواج واعرف متطلبات الزوجه ورغبتها احل مشاكل زوجيه بس الحين صرت زي الي قدر يعالج ناس ولا قدر يعالج نفسه . يعني بديت اتغير وبديت اتعب من التفكير بديت اكره كل شي وكل يوم اسوء من الثاني ..
والسبب انتم سموه ..
نبدا في الموضوع وارجو التركيز ..
تذكرون اخواني لما صدر قرار بخصوص المتزوجين انهم مايتزوجون الا بعد الفحص الطبي .. الخ ؟؟
طبعا وصلت المعلومه قبل اصدار القرار للاهل فقالو ؟؟ االوالد والوالده مع اتفاق الخال وزوجة الخال الله يسعدهم دنيا واخره .. قالو نبي نزوج فلان اللي هو اخوي اللي اكبر مني لبنت خالي .. قبل يجي القرار ويصير هيك وهكا ... لان من اول كانو خاطبين بعض .. المهم جابو الشيخ اللي نسميه المليك .. عشان يعقدون للزواج ..طبعا اكيد وقت الملكه لازم نحضر والاقارب يحضرون ,, فجيت وكل الاقارب مجتمعين ,,
المهم .. جا اخوي عند المليك وقرا وسوا العقد ,, وابتسامات وضحك .. ومبروك ومن هالكلام
طبعا فيه انا واخوي الي اصغر مني جالسين جنب بعض ونعلق ونضحك .. فجأه ابوي ناداني انا واخوي الي جنبي قال وش رايكم تملكون؟؟
عشان بعدين ماتصير مشاكل فحص طبي وتريحون راسكم من هالغثا ..ومدري ايش والمشكله قال الكلام هذا قدام الناس عن نيه صافيه طبعا ..
انا سالت نفسي منهي اللي باخذها شي يضحك صح؟؟
قالو بنت خالك اللي هي اصغر من اللي ملك عليها اخوك ؟ واخوي اللي اصغر مني ياخذ اللي اصغر منها .. يعني كلنا الثلاثه بيزوجونا من بنات خالي اللي اخذ منه اخوي الكبير ..
المهم فيه ناس ايدو الوضع وقالو والله فكره و اريح لكم الحين وعسى الله يكتب لكم اللي فيه الخير ..
انا الحين طحت في ورطه قدام الناس وتوهقت ووقتها مدري وش صار لي طلبوني البطاقه انا واخوي اللي اصغر مني عطيتهم ع بالي اني بكون شاهد او من هالقبيل تفاجئت الا قال لي الشيخ تعال وجيت عنده قال ردد وراي .. قبلت بها كزوجه ومدري ايش .. انا ماستوعبت وقتها ؟؟ لان اصلا مابراسي زواج ولا فكرت بالزاوج
ماستوعبت الموقف الي بعد الحدث ,.. ولو عقلي الحين ماصار هاللي صار كله والسبب المجامله والاحترام ,, واستغلو التفكير ع بالهم اننا صغار وان اللي سووه على حق وصواب
المهم في نفس ت الحضور فيه بعض خوالي موجودين وزعلو على الوالد.وقالو ليش ماخذتو من بناتنا وش معنى كلهم ملكو على ثلاث اخوات ..والمصيبه وصار فيه سوء تفاهم لان واحد من خوالي ع باله بناخذ بنته وبشر ااهله وتفاجىء اننا اخذنا ثلاث اخوات ..وصارت مشكله ليلتها وزعل كبير ..؟؟
شي اغرب من الغريب صح ؟؟ انا زيكم ترا مستغرب ايش اسمي هالتفكير ؟؟
خلاصة الكلام ان اخوي الي اكبر مني مرت سنه وهو ملك ودبر اموره و تزوج وعسى ربي يهنيه ,. واخوي اللي اصغر مني تزوج بغد ملكته بثلاث سنوات وعسى ربي يوفقه ويهينه ...
طيب انا ؟ مرت ست سنوات والانظار علي؟ والناس تنتظر ؟؟ لان وقتها مو موظف وبنفس الوقت ؟؟ اعاتب نفسي طول هالفتره الي ملكت فيها وش سويت انا ؟؟ ليش وهقت نفسي؟ وربطت نفسي وانا اصلا مافكرت في زواج وليش جبروني؟؟ يعني المساله لعب وزواج تقليدي اجباري؟؟
المهم شفت وضع اخواني قلت شكلها خيره لي ؟؟ المهم جتني وظيفه مؤقته ؟؟ راتبها الفين ريال؟؟ لما سمعو الاهل اني توظفت الا انواع الاتصال ؟؟ تعال تزوج خلاص انت توظفت ؟؟ واهلها ينتظرونك؟؟ وجدتي الله يطول بعمرها تتصل علي لو ماتجي خلال الاسبوع هذا وربي ماكلمك ؟؟
اقول في نفسي لاحول ولا قوة الا بالله انا وش سويت؟؟ طيب الحين وظيفتي مؤقته وماصار لي اربع شهور ؟ قالو لي تعال بس ندبرك اهم شي اسم وظيفه ..
المهم انواع المكالمات ليل نهار لين جيت سويت شقه في نفس بيت اهلي .. وجهزنا للعرس وانا والله والله والله ماحسيت بالفرح ولا حماس الزواج يعني كاني في عزا .. والسبب براسي ان الطريقه كلها من اولها غلط ؟؟ واقول لنفسي ؟ خيره خيره خيره انشاء الله بعد الزواج بيكون وضعي غير وخيره لي نفس كلامهم ؟؟ وهذا الي نسمعه اكثر شي يقولون تزوج وربي يفتحها بوجهك << طيب المبدا في زواجي بالطريقه هذي صح ؟؟
.. على فكره الزوجه ماشتفها ولا ادري عنها .. لان سالت امي والاهل يقولون تجنن بكل شي؟؟ وكثير منكم يؤيد كلام الام والاهل تجاه اختيارهم للزوجه ..
المهم جا وقت ليلة الدخله .. وانتظر وانتظر وانتظر بلهفه
وجابو العروس ولكن... بيني وبينكم انصدمت اول شي واضح من جسمها سمينه .. قلت وانا بصراحه طبعي مايهمني الشكل بس تعرفون انا ضحية غلطه وسمعت كلام غير اللي شفت الحين وسكت شوي لين راحت امها وبعض الاهل وخلونا بروحونا
قربت لها ابتسمت مبروك وصليت وقريت عليها وكشفت عن وجهها وبرضو صدمه لان عكس الي قالو .. بس قلت برضو مايهم الشكل .
والمصيبه .. واللي قهرني .. اني اكتشفت ان فيها مرض وعسى ربي يشفيها ويشفي مرضى المسلمين ..اللي هو مرض البهاق في جسمها .. انا مدري وش اقول وقتها مو عشانها مريضه بالبهاق بالعكس انا انسان نظرتي للجواهر قبل المظاهر وعمر هالامور ماصارت مشكله او عقده للناس الي تفكر في عقل ... ولا اعتبره عاهه ..لكن
لكن
لكن
اقولها بصوت عالي ؟؟؟ ليش يغشوووني؟؟؟؟ ليش ماقالو لي من البدايه هذا كله ....وكثير ناس صار معهم كذا بس ليش هالظلم ؟؟ اي زواج اسميه وش بيكون موقفي وانا مصندم قدام هالمسكينه ؟؟
المهم مسكت نفسي ايام وبديت اضحك وعادي بس بصراحه ماحسيت بطعم الزواج بسبب طريقة زواجي الفاشله .. يعني لو انا الي اخترتها عادي واتحمل كل شي ولا الوم نفسي بشي وارجع واقول هل هذا الزواج الصحيح؟؟
ونقول المهم اني جلست فتره مالي نفس بشي بداية الزواج عادي ضحكنا سافرنا بس بعدها بدا الكره وبدات الحرب النفسيه .. قلت لنفسي اصبر؟ كثير اتزوجو وفي بداية زواجهم تعقدو لانهم انتقلو من مرحله عزوبيه الي حياة زوجيه فيتغير عليه الروتين ويتعود بعدها على الزواج ويكون وضعه زي غيره استقرار وحياه سعيده ..
لكن للاسف ؟
كل شهر اسوء من شهر ..
والله والله ان هالزوجه طيبه واخلاق ودين ولا قصرت معي بأي شي ولا زعلتني بشي وتحترمني من كل النواحي باختصار واالله انها كامله والكمال لله
وتحبني حب من قلب .. بس انا تعبت ... عجزت اتأقلم واساير. مابي اسولف معها ولا ابي اضحك ولا ابي اقول شي .. ليش مدري ,,؟؟
اسافر واطول بالسفر وتتصل ماحب ارد عليها ولا احب اسمع صوتها ,, واذا كلمتها احاول امسك نفسي عن الهواش ابي اي مشكله عشان اهاوش ؟؟ اسال نفسي ليش انا كذا اقول مدري؟؟ تجيب لي هدايا اقول ليتها ماجابت ؟؟ تسوي احلى اكل اقول ليتها ماسوت تلبس احلى لبس اغصب نفسي عشان اجاملها ؟؟
ياناس انا اعرف نفسي زين انا انسان اعرف وش تبي الزوجه واعرف متطلباتها واعرف وش تكره بس انا ؟؟ هالشي جيت عكسه .. ادري اني مقصر في بعص الامور معها وادري انها صبرت .. واعرف انها مازالت صابره ...واعرف انها مسكينه وضعيفه واعرف ان لها الف حق بس انا بكل شي ماقصرت معها الا بالكلام الحلو ماقلته له وادري انه اهم شي عند البنت كلام زوجها ورومنسيته ... تساوي عندها الدنيا ومافيها
رغم اني اعرف هالشي مازلت اجي عكسه ما اطيق اي شي منها
ادري كلكم ومو بس انتم بتقولون حرام ومسكينه صح؟؟ عشان كذا اقول لكم مابي تعاطف ؟؟ ولا نبي عنصريه لان اكتشفت ان اغلب الناس مع الزوجه وضد الزوج في العواطف ..!!
قلت لااخوي.. قال مسكينه وحرام عليك اللي تسويه .. وزاد همي
سالت خالتي.. قالت نفس الشي واكثر .. وثارت همومي
قلت لنفسي هل هذا خطاي ؟؟ مع العلم هالشي مو بكيفي وكل السالفه مو بكيفي وانا ليش وهقت نفسي؟ دامها مسكينه ومن هالكلام وكلكم تقولون مسكينه في موقف زي كذا
انا وش اكون كل هالحمل علي؟؟ مالي احساس مثلا؟ مالي شعور تتتوقعون هالشي بيدي؟؟ لو بيدي ماقلت لكم ولا وصلت نفسي للماساه.. ابي اعرف انا وش اطلع بالموقف هذا وش اكون؟؟
محاصر من كل جهه ماحس اني متزوج ولا اعاشرها ... بعد تتوقعون هالشي بكيفي لا والله وربي مو بكيفي صبرت صبرت صبرت صبرت صبرت ومازلت اعاني رحت شيخ استخرت سافرت الوضع زي ماهو وللاسوء ..
سافرت انا وهي بنغير جو قلت يمكن البلى في بيتنا او شي وتعقدت بالسفره.. كابه احس فيها.. وضيق صدر ؟؟
لان اقول يمكن عين يمكن سحر بس تذكرت كلام ناس يقولون انتم اي شي يصير تقولون عين او سحر ؟؟؟ صح هالكلام والا لا؟
الان ولي عنها ثلاث شهور بين ايه ولا ؟؟ تدرون المصيبه الاعظم ايش؟ خالي عارف وشايف وساكت وانا اعرف هالشي فيه وامها والله والله والله ليومكم ذا ماقد سمعت منها كلمه بخصوص اسلوبي وتعاملي مع بنتها ودايم تضحك بوجهي ..
بس انا افهمهم .. مايبون يجي منهم اي شي؟ يعني لو احد منهم تدخل في اموري يمكن اخليه سبب بس من زود حرصهم ساكيتن وامي نفس الشي والاهل نفس الشي ساكتين ؟؟
والحين وانا في ديره واهلي في ديره وانا بروحي ثلاث شهور = وجهاد بيني وبين نفسي وياشينه من وضع لا وهم يحسبوني اضحك ومبسوط والله مالي خلق بأي شي .. ولو شكيت لاحد ضيع الموضوع لان مايحب يقرر في سواليف زي كذا وامور زوجيه ...
اصلي وادعي وللحين من شيخ لشيخ وقالو مافيك شي .. الناس بدت تتكلم وتطلع كلام بس مو مهم كلام الناس .. النظرات كلها ضدي .. الان لو بروح الاهل والجماعه هناك .. وش بيصير . اكيد راح اطفش من سؤال وينك؟؟ وسؤال وش فيك قطعت عن اهلك .. الخ بس ماعلي من كلامهم ,,
الكبير والصغير الحين صار عارف وانا والله بغنى عن هالسوالف هذي كلها ولا فكرت بيوم من الايام بمر بموقف زي كذا بس اسال الله ان يختار لي اللي فيه الخير
انا الحين بصراحه مقرر الطلاق بس المشكله هي وامها وابوها واهلي .!! ادري لو طلقت بخسرهم اقل شي سنه لين تعود المياه لمجاريها
والان مدري كيف ابدا لاني اليوم هذا بسافر لهم بأذن الله
محتار عشانها لما تكون مطلقه محتار من صدمة اهلها ...
الله يسامح من كانو السبب وورطوني وفتحو علي الف باب وباب ..
انتظر رايكم في الموضوع بكل انصاف قراري بالطلاق؟ على حق او لا .. واسف جدا جدا جدا اني طولت عليكم ,, واسال الله العلي العظيم ان يوفقكم دنيا واخره وتكون من اهل البيوت السعيده وعساكم ماتمرون باللي مريت فيه
aitdaoud1
- قبل السؤال و الطلب استخدم خاصية البحث في الموقع من هنا.
- اجتنب الكتابة بلغة غير مفهومة، إذا أردت الكتابة باللغة العربية من هنا.
- مشاركة واحدة مفيدة خير من 100 رد بلا معنى.
- إن أفدت عضوا ، لعله غدا هو من يفيدك
- لا تنس الصلاة في وقتها المفروضة |
موضوع: لم اتقبل زوجتي ولا اعيش معها حياه زوج 
الأحد مايو 27, 2012 10:52 pm
